سوات میں جلسہ عام سے خطاب کرتے ہوئے قائد جمعیت مولانا فضل الرحمان کا کہنا تھا کہ دشمن کمزور اور بزدل ہے، اسی لیے وہ چور دروازے سے حملہ کرتا ہے،پارلیمنٹ میں دیکھا کیسے چور دروازے سے انہوں نے ختم نبوت کے قانون پر نقب لگانے کی کوشش کی، چور جب چوری کرتا ہے تو محسوس نہیں ہونے دیتا کہ چوری کر رہا ہوں۔
مولانا فضل الرحمان کا کہنا تھا کہ کوئی مائی کا لال ختم نبوت کے قانون کو نہیں چھیڑسکتا، جو کوئی ختم نبوت کو چھیڑے گا وہ اپنی موت کو دعوت دے گا، میں آج بھی کہتا ہوں اس قسم کے عزائم سے دستبردار ہو جاؤ، جب بھی کوئی آزمائش آتی ہےجمعیت علماء اسلام ہی میدان میں اترتی ہے۔ انہوں نے کہا کہ پارلیمنٹ میں چور دروازے سے ختم نبوت حلف نامے میں ترمیم کی کوشش کی گئی تاہم جمعیت علماء اسلام نے اس کوشش کو ناکام بنایا جب کہ کسی کو اس سازش کا علم نہیں تھا۔
قائد جمعیت نے کہا کہ 3 سال قبل کہا تھا چوری پکڑی گئی ہے، سازشیوں کو منہ کی کھانی پڑی .
دہشت گردی کو نظریاتی شکست جمعیت علماء اسلام نے دی ہے، امریکی صدر نے واضح کردیا ہے سی پیک متنازعہ علاقے سے گزرہا ہے، امریکا اور بھارت کی زبان ایک ہوگئی ہے، پاکستان کے روشن مستقبل پر کلھاڑا مارنے کی کوشش کی جارہی ہے جب کہ ہمیں افغانستان سے لڑوایا جارہا ہے۔
قائد جمعیت مولانا فضل الرحمان کا کہنا تھا کہ آپ پاناما کو کرپشن کا مسئلہ سمجھتے ہیں تاہم میں اسے پاکستان کے خلاف سازش دیکھتاہوں، فاٹا مسئلہ اتنا سنگین نہیں جتنا بنادیا گیا، کچھ لوگ مفت میں مامے چاچے بن رہے ہیں، ایف سی آر کے خاتمے کے خلاف ہم 100 مرتبہ ساتھ ہیں۔ ان کا کہنا تھا کہ فاٹا کے قبائل کو اپنے مستقبل کا فیصلہ کرنے کاحق دو، جان بوجھ کر فاٹا کو پسماندہ رکھا گیا اور اس سنجیدہ مسئلہ کو خواہ مخواہ الجھایا جارہا ہے، قبائلی مسئلے کے پیچھے دباؤ امریکی سامراج کا ہے تاہم قبائل کا فیصلہ ہم نے کرنا ہے۔
جلسہ سے ڈپٹی چیئرمین سینٹ مولانا عبد الغفور حیدری ، وفاقی وزیر اکرم خان درانی ، مولانا گل نصیب خان ، پیر عزیز الرحمان ہزاروی ودیگر قائدین نے بھی خطاب کیا جلسہ میں عوام کی کثیر تعداد نے شرکت کرکے جمعیت علماء اسلام کی قیادت پر اعتماد کا کیا اس موقع پر بڑی تعداد میں لوگ دیگر جماعتوں سے مستعفی ہو کر جمعیت علماء اسلام میں شامل ہوئے
