بھارت گولی کے زریعے آزادی کی تحریک کو دبانے کی کوشش کررہا ہے، کشمیرمیں بھارتی مظالم کی سخت الفاظ میں مذمت کرتے ہیں اور اسے کھلی دہشت گردی قرار دیتے ہیں.مولانا فضل الرحمان

جمعیت علماءاسلام پاکستان کے امیر مولانا فضل الرحمٰن نے کشمیرمیں بھارتی مظالم کی سخت الفاظ میں مذمت کی ہے اور اسے کھلی دہشت گردی قرار دیا ہے اور کہا ہے کہ بھارت گولی کے زریعے آزادی کی تحریک کو دبانے کی کوشش کررہا ہےمگر تمام تر مظالم کے باوجود تحریک آگے بڑھ رہی ہے۔
ان کا کہنا تھا کہ آج جس طرح انسانی لاشیں گرائی گئیں ہیں اس پر تو پوری دنیا کو سراپا احتجاج بن جانا چاہیئے تھا،لیکن عالمی ادارے خاموش تماشائی کا کردار ادا کرکے آزادی کی تحریک کو عملی طور پر اپنی قراردادوں کو روندتے ہوئے بھارت کا ساتھ دے رہے ہیں۔
مولانا فضل الرحمٰن آج جے یو آئی کے سب آفس المرکز الاسلامی اسلام آباد میں مرکزی مجلس شوری کے اجلاس سے خطاب کررہے تھے۔
ان کا کہنا تھا کہ بھارت کے جبر کے باوجود تحریک زور پکڑ رہی ہے،کشمیر میں چلنے والی تحریک کو گولی کے زریعے دبانا اب بھارت کے بس میں نہیں۔آج جو خون کی ہولی کھیلی گئی ہے اس پر عالمی دنیا کو ایکشن لینا ہوگا۔مولانا نے فلسطین میں ہونے والے مظالم کی بھی شدیدترین الفاظ میں مذمت کی۔ان کا کہنا تھا کہ ان مظالم کے خلاف پورے عالم اسلام میں شدید غم و غصہ پایا جاتا ہے۔ان کا کہنا تھا کہ اپنے حقوق کی خاطر جنگ لڑنے والوں پر گولیوں کی بوچھاڑ ہورہی ہے اور عالمی ادارے خاموش تماشائی کا کردار ادا کررہے ہیں یہ قابل نفرت ہی نہیں بلکہ قابل مذمت بھی ہے۔
یو این او صرف مذمتی بیانات ہی نہ دے بلکہ اپنا عملی کردار ادا کرے۔
جے یو آئی کی شوری نے بھارتی اور سیہونی مظالم کی شدید مذمت کی اور عالمی اداروں پر زور دیا کہ ان مظالم کو بند کروانے میں اپنا حقیقی کردار ادا کرے۔
مرکزی شوری نے اسلامی سربراہی کانفرنس پر بھی زور دیا اور یو این او سے اچھائی کی توقع رکھنے کی بجائے مسلمانوں کے تحفظ کیلئے فوری اقدامات بروئے کار لائے۔
مولانا فضل الرحمٰن نے شوری کے اجلاس سے خطاب کرتے ہوئے کہا کہ جے یو آئی بروقت انتخابات کرانے کی حامی ہے۔اسمبلیاں اپنی مدت پوری کرنے جارہی ہیں اور عوام انتخابات کیلئے تیار ہیں۔ہمارے نزدیک ملک کو بحرانوں سے بچانے کیلئے بروقت انتخابات ہی تمام مسائل کا حل ہیں۔1973 کے آئین میں تمام امور درج ہیں۔اب ان پر عمل پیراہ ہو کر ملک بحرانوں سے بچایا جاسکتا ہے۔
مولانا نے مزید کہا کہ آئندہ انتخابات متحدہ مجلس عمل کے پلیٹ فارم سے کتاب کے نشان پر لڑیں گے۔
ایم ایم اے آئندہ انتخابات میں سیکولر قوتوں کو شکست فاش دے گی۔
اجلاس سے مولانا عبدالغفور حیدری،الحاج اکرم خان درانی،سائیں عبدالقیوم ہالیجوی،مولانا فیض محمد،مولانا محمد امجد خان ،مولانا صلاح الدین ایوبی ،مولانا گل نصیب خان،ڈاکٹر عتیق الرحمٰن، علامہ راشد سومرو،مولانا عطاءالرحمٰن،ملک سکندر خان ایڈوکیٹ،مولانا امیرزمان ،ودیگر نے بھی خطاب کیا،
مرکزی مجلس شوری کا اجلاس کل بھی جاری رہے گا۔۔۔