ڈیرہ اسماعیل خان:
قائد جمعیت مولانا فضل الرحمان نے کہا ہے کہ نقیب اللہ محسود کی شہادت پر پورا ملک سراپا احتجاج ہے ہم غم کی اس گھڑی میں شہید کے خاندان کے دکھ میں برابر کے شریک ہیں ظلم کی داستانوں کا یہ کھیل اب ختم ہوناچاہیے ایسی داستانیں رقم کرنے سے امن بہتر ہونے کے بجائے بگاڑ اور انتشار پیدا ہو گا .
ان خیالات کااظہار انہوں نے ملک مسعود احمد محسود ۔ سید شاہ محسود کی رہائش گاہ پر محسود قومی جرگہ کے موقع پر نقیب اللہ محسود کی تعزیت کے دوران کیا اس موقع پر قبائلی عمائدین روزی خان۔ گل محمد ۔ عطاء میر ۔ علی باز خان۔ حلقہ ایم این اے مولانا جمال الدین کے نمائندے صلاح الدین محسود ایڈوکیٹ اور سیف اللہ سیفی محسود بھی موجود تھے .
قائد جمعیت مولانا فضل الرحمان نے کہا کہ قانون نافذ کرنے والے اداروں کو لازمی ہے کہ قانون کے دائرہ میں رہ کر کام کریں اس سانحہ پر قومی اسمبلی میں مولانا جمال الدین کی پیش کردہ قرار داد مذمت منظور کی گئی اسمبلی میں فاتحہ خوانی بھی کی گئی
ہم نے ہمیشہ ظلم کے خلاف مظلوم کا ساتھ دیا جمعیت کے کارکنان نقیب اللہ محسود پر ہونے والے ظلم پر احتجاج کررہے ہیں اور یہ جماعتی پالیسی ہے کہ مظلوم کا ساتھ دیا جائے اور ایوان کے اندر باہر ہم یہ کردار ادا کررہے ہیں انہوں نے کہا کہ واقعہ کے نامزد ملزمان کے خلاف اوپن تحقیقات ہونی چاہیئے اس معاملہ میں شفاف تحقیقات کی آصف علی زرداری نے بھی یقین دہانی کرائی ہے ۔ انہوں نے کہا کہ وزیرستان معدنیات کا خزانہ ہے جہاں سے یہاں کے باشندوں کو رائلٹی دینی چاہیئے
حقائق سب کے سامنے ہیں کہ پورے قبائلی خطہ کے حق میں ہمیشہ جمعیت علمائے اسلام نے ہی آواز بلند کی ہے اور کرتے رہیں گے
